პროექტები

მთავარი კითხვა: როგორ გამოვზარდოთ არასეზონური მცენარე სათბურის პირობებში და შემდგომ მოვახდინოთ მისი რეალიზაცია?

ხანგრძლივობა: პროექტზე მუშაობა 6 კვირა; პროდუქტის მიღების მოლოდინის პერიოდი 8 -10 კვირა. 

პროექტის განხორციელებისას მოსწავლეებმა პირველ ეტაპზე შეიმუშავეს გრძელვადიანი სამოქმედო გეგმა, სადაც თანმიმდევრულად დაალაგეს მიზნის მასაღწევად შესასრულებელი სამუშაოები. მათი გეგმის მიხედვით, პირველად აუცილებელი იყო, ლიტერატურის გამოყენებით შეერჩიათ ადვილად მოსავლელი, მაღალპროდუქტიული, სწრაფად ზრდადი მცენარე და შეესწავლათ მისი მოყვანისა და მოვლის მეთოდები. განხილული ვარიანტებიდან შეარჩიეს მცენარე ტიტა. ლიტერატურის დახმარებით მათ აღმოაჩინეს მნიშვნელოვანი ფაქტი, რომ ტიტას ყვავილობისთვის აუცილებელია, ბოლქვებმა გამოიზამთრონ მინიმუმ 6 კვირის განმავლობაში 4-5 0C-ზე. ამისთვის ტიტები მოათავსეს მაცივარში.

გეგმის შემდეგ ეტაპს წარმოადგენდა შეესწავლათ სათბურის მოწყობის, მორწყვის, გათბობის სისტემები; განეხილათ სხვადასხვა მასალის, კონსტრუქციისა და ტიპის სათბურები და შეერჩიათ ისეთი ტიპის სათბური, რომლის აწყობასაც თავად შეძლებდნენ. კონსტრუქციისთვის დასჭირდათ მასალად ხე, ხოლო საფარ მასალად სასათბურე ფირი (ცელოფანი). აღნიშნულის შემდეგ მოსწავლეებმა შექმნეს სათბურის მოდელის ნახაზები, რომლის მიხედვითაც შემდგომ ააწყეს სათბურები. ამასთან, შეადგინეს საჭირო რესურსების სია.

მას შემდეგ, რაც ტიტას ბოლქვებმა მაცივარში გამოიზამთრეს, მოსწავლეებმა ისინი დარგეს და მოათავსეს სათბურში. ტიტებმა ეტაპობრივად ყვავილობა ორი თვის შემდგომ დაიწყეს. 

ტიტების რეალიზაციისთვის მოსწავლეებმა შეიმუშავეს გეგმა: პირველ ეტაპზე მათ გამოთვალეს, რა დაჯდა თითო ტიტას მოყვანა და გამოითვალეს მისი გასაყიდი ღირებულება. შექმნეს ეტიკეტები, სადაც მყიდველისთვის მითითებული იყო ტიტას მოვლის წესები.

შემდგომ მოიფიქრეს, სად და როგორ გაყიდდნენ და, საბოლოოდ, მოახდინეს მისი რეალიზაცია.